Սրտի շրջանի ցավեր. armeniamedicalcenter.am

Թերևս, մարդկանց մեծամասնությունը թեկուզ մեկ անգամ կյանքում զգացել է ցավ կամ այլ տհաճ զգացողություն կրծոսկրի հետևում կամ կրծքավանդակում` կրծոսկրից ձախ, հատկապես այնտեղ, որտեղ տեղակայված է սիրտը: Այդ ցավերն իրենց վրա ուշադրություն են հրավիրում և անհանգստություն են առաջացնում առավել շատ, քան այլ ցավերը: Մենք այդպես բնազդորեն ռեակցիա ենք տալիս այդ կարևոր օրգանի շրջանի խնդիրներին: Հենց այնպես չէ, որ սրտի շրջանի ցավերի պատճառով ամենահաճախ են դիմում բժշկի:

Սրտի շրջանի ցավերը տարբերվում են բազմազանությամբ: Դրանք ծակում են, ճնշում, սեղմում, այրում, նվվում, ձգում, կտրուկ թափանցում: Նրանք կարող են զգացվել ոչ մեծ շրջանում կամ տարածվել ամբողջ կրծքավանդակում, տարածվել դեպի ուսը, թևը, պարանոցը, ստորին ծնոտը, որովայնը, թիակի տակ: Դրանք կարող են հայտնվել մի քանի րոպե կամ տևել ժամեր, երբեմն նաև` օրեր, կարող են փոխվել շնչառության ժամանակ, ձեռքերի և ուսագոտու շարժումների, դիրքի փոփոխության ժամանակ և այլն: Երբեմն դրանք հայտնվում են ֆիզիկական կամ հուզական լարվածության ժամանակ, երբեմն՝ հանգստի կամ սննդի ընդունման ժամանակ:

Սրտի շրջանի ցավերի պատճառները բազմաթիվ են: Դրանցից են սրտի այնպիսի հիվանդությունները, ինչպիսիք են ստենոկարդիան, միոկարդի ինֆարկտը, սրտի և նրա թաղանթի բորբոքումները, ռևմատիկ ախտահարումները: Բայց հաճախ ցավի աղբյուրը գտնվում է սրտից դուրս, ինչպես օրինակ, նևրոզների, կողերի և ողնաշարի կրծքային հատվածի հիվանդությունների, ստամոքս-աղիքային համակարգի խնդիրների և շատ այլ հիվանդությունների ժամանակ:

Առաջացման պատճառները

Սրտի շրջանի ցավը մարդկանց շտապօգնության դիմելու ամենահաճախակի պատճառներից է: Այդ ցավերն ըստ ծագման կարելի է բաժանել երկու հիմնական խմբի.

• անգինոզ ցավեր, որոնք առաջանում են իշեմիկ հիվանդության տարբեր փուլերում,
• կարդիալգիաներ, որոնք առաջանում են սրտի բորբոքային հիվանդությունների, սրտի բնածին հիվանդությունների, արատների կամ վեգետա-անոթային դիստոնիայի ժամանակ:

Անգինոզ (իշեմիկ, ստենոկարդիալ) ցավերn ի հայտ են գալիս արյան հոսքի ավելացման անհրաժեշտության ժամանակ, որն արտահայտվում է ֆիզիկական կամ հուզական լարվածության արդյունքում: Այդ պատճառով այս ցավերին բնորոշ է նոպաների առաջացումը քայլելիս, հուզական խնդիրների դեպքում և դադարելը` հանգիստ վիճակում, արագ վերացումը` նիտրոգլիցերինից:

Բնույթով իշեմիկ ցավերը, սովորաբար, այրող են, ճնշող, սեղմող, կծկող, զգացվում են, որպես օրենք, կրծոսկրի հետևում և կարող են տարածվել դեպի ձախ ուս, թև, թիակի տակ, ստորին ծնոտ: Դրանք երբեմն ուղեկցվում են հևոցով: Շատ ուժեղ, ճնշող, սեղմող, պատռող, այրող ցավը կրծոսկրի հետևում կամ նրանից ձախ, միոկարդի սուր ինֆարկտի ախտանիշներից է, ընդ որում, այդ ցավը նիտրոգլիցերինի ազդեցությամբ չի անցնում:

Սրտի ռևմատիկ հիվանդությունների, միոկարդիտների և սրտի արտաքին թաղանթի՝ պերիկարդի, բորբոքային հիվանդությունների ժամանակ առաջացող կարդիալգիաները, սովորաբար, երկարատև են, նվվացող կամ ծակող բնույթի, տարածվող, ծագում են կրծոսկրից ձախ, ուժեղանում են շնչառության ժամանակ և հազալիս: Դրանք չեն անցնում նիտրոգլիցերինի ընդունումից, բայց կարող են թուլանալ ցավարկող դեղեր ընդունելիս:

Եթե սրտի շրջանի ցավը փոխվում է կռանալիս և մարմինը շրջելիս, խորը ներշնչելիս և արտաշնչելիս, ձեռքերը շարժելիս, և նիտրոգլիցերինի կամ վալիդոլի ընդունումը չի ազդում նրա ուժգնության վրա, ուրեմն, այն հնարավոր է, որ պայմանավորված է կրծքային ռադիկուլիտով կամ կողային աճառների հիվանդություններով:

Միջկողային շրջանների ուժեղ ցավը, երբեմն գոտևորող որքինի առաջին նշան է, իսկ սրտի շրջանում հաճախ ոչ մեծ տարածքում տեղակայվող կարճատև կամ պերիոդիկ ցավը, նվվացող, ծակող կամ անորոշ բնույթի՝ նևրոզով հիվանդների հաճախակի գանգատն է:

Սթրեսը և դեպրեսիան կարող են արտահայտվել ցավերով պարանոցա-ուսային շրջանում: Նա, ով անհանգստացած դիմում է բժշկի՝ համարելով, որ իր մոտ «սիրտը վատ է», սովորաբար տուն են վերադառնում հանգստացած՝ ցավերը միայն մկանների հետ են կապված:

Հաճախ հևոցը, սրտում սեղմող և ծակող ցավերն արդյունք են աղիների փքվածության, որը, ճնշելով սրտին, խանգարում է նրա գործունեությունը:  Եթե սրտի շրջանի ցավերը կապ ունեն որոշակի սնունդ ընդունելու հետ, ապա պատճառը կարող է լինել ստամոքսի կամ ենթաստամոքսային գեղձի հիվանդությունը: Նաև ցավի պատճառ կարող են դառնալ սրտային նյարդարմատի սեղմումը, ողնաշարի թույլ կրծքային շրջանը, նրա թեքվածությունը, օստեոխոնդրոզը և այլն:

Հարցեր, պատասխաններ, մեկնաբանություններ